எதிர்பாராத பரிசு..!

இம்மாதிரி, ஒரு குறிப்பிட்ட புத்தகத்தை வாசித்த அத்தனை பேரின் வாசக அனுபவங்களையும் தொகுத்து இன்னொரு புத்தகமாக வெளியிடும் முயற்சியில் சுந்தர் துணிந்து இறங்கியிருப்பது எனக்கு வியப்பளித்த விஷயம். இம்மாதிரியான தொகுப்பு நூல்கள் தமிழில் இதுவரை மிக மிக அரிதாகவே – மொத்தமே இரண்டோ மூன்றோதான் வந்திருப்பதாக எனக்கு நினைவு – வெளியாகியிருக்கின்றன. அந்த வகையில், இது ஒரு முன்மாதிரியான முயற்சி. இது வெல்ல வேண்டும். வாசகர்கள் எத்தனை விதங்களில் இந்த நூலை அணுகியிருக்கின்றனர் என்பது வியப்பளிக்கும் ஒன்று. பெற்றோர்கள், ஆசிரியர்கள், சாதாரண வாசகர்கள், பாட்டி-தாத்தாக்கள் -இவ்வளவு பேரும் வெவ்வேறு கோணங்களில் தங்களின் சொந்த அனுபவங்களோடு நூலின் அனுபவங்களை உரசிப் பார்த்து வியந்திருக்கிறார்கள்! இத்தனை பேரின் அனுபவங்களும் சுந்தரின் அனுபவங்களோடு உரசியிருக்கின்றன.